Journal
fragments of my thoughts, feelings, and memory
Aynupuri Seminā K=eyyorot
2026 pa 8 cup 18 to wano 26 to pakno, Ainu Bunka Koryū Sentā un poro ukoytak tumpu or ta “ Ainu Bunka Hukyū Keihatsu Seminā ” an ruwe ne. Kōza wanpe oka wa, ku=monrayke okake ta oka tu kōza k=eyyorot ruwe ne. Aynu Sinotca Oruspe Hoski kōza anak “ Ainu no Uta to Buyō de Todokeru Monogatari ” ne wa, ipakasnukur Toyokawa Yōko katkemat ne ruwe ne. Toyokawa katkemat anakne, Operper un Husko-kotan omotokor aynu ne ruwe ne wa, tane Satporo ta an ruwe ne. Toyokawa katkemat anak Nincup sekor a=ye uekarpa or ta sinotcaki ruwe ne. Mosir epitta sinotcaki hawe ne. “Sinot anak tu icicikan utur ta sinotcaki=an yakka pirka korka, isoytak a=kopan kusu, yupkosanpa=an na.” sekor katkemat hawean hi k=esikarun ruwe ne. Toyokawa katkemat ne kōza or ta hemanta kusu sinotcaki oasi ya ka un=nure ruwe ne. Atpake ta, aynu ne p eranak hawe ne. Korka, terebi ka ta Okinawa -un-kur nukar wa, “Ne utar koraci an=an rusuy” sekor yaynu hawe ne. Ayne, kuruma ani Nihon ekari wa Okinawa un arpa hawe ne. Orowano, Hyōgo-ken un tup wa sinotcaki oasi ruwe ne. 30 pa ne hi ta Yaunmosir un hosipi wa, easir aynu monrayke sanke ruwe ne. Ne kōza or ta Toyokawa katkemat Nincup or ta a=kar “ Hapo no Monogatari ” oruspe un=nure wa un=kore ruwe ne. “ Hapo no Monogatari ” anak, matnepoho tononte hi ta iomante esikarun wa “Tan matnepo kimunkamuy ne yakun, makanak an ya?” sekor ramepakari kusu kar pe ne hawe ne. Ne monrayke eiga ne ka a=kar ruwe ne. Iotta iosno, “rehotne sinta” sekor a=ye iyonnotka un=nure wa un=kore ruwe ne. Toyokawa katkemat ye “rehotne sinta” anak, Ainu-Minzoku-Bunka-Zaidan YouTube kasike ta ka a=sanke wa, tane pakno 130- man suy a=nukar ruwe ne. Káni ka YouTube ka ta ku=nukar amkir kusu, easir anpe ku=nu wa k=erayap ruwe ne. Iwor Pirkano A=eraman Ios kōza anak “ Chiiki Shigen no Seisoku Ritchi ” ne wa, Miki Noboru nispa ipakasnukur ne ruwe ne. Miki nispa anak “ Kita no Mori Shizen Denshūjo ” sekor a=ye uekarpa or ta siror-epakasnu-kur ne nepki ruwe ne. Piratur ta ka aynupuri uuste kusu okkaypo respa wa an ruwe ne. “Ramma kane soy ta patek ipakasnu=an kusu, rok=an yak humi wen na” sekor Miki nispa hawean kor, oyakoyak omanan kor isoytak siri k=esikarun ruwe ne. Miki nispa anak, aynu itak ani hunara hi ta, sísam rehe ne a=nuye itak sinnayno an pe pa kusu, aynupuri eramasu hawe ne. Citarpe kar kusu c=eywanke “sikina” ne manu p, sísam itak or ta “ gama ” ne a=nuye ruwe ne korka, anpe anakne “ suge ” ani a=kar citarpe ka oka hawe ne. Kasiun, Sisirmuka sam ta hetuku wa oka usa oka kina eysoytak ruwe ne. Hunak ta an ya ka, hemanta yaku kor ya ka, un=epakasnu wa un=kore ruwe ne. Etakasure, “cikisani” oruspe k=eramasu ruwe ne. Sisirmuka sam ta apto sirsimoye ani sirhorutke ruwe ne. Cikisani anak, orano a=kar toy ka ta, tuyma hi wa hopuni wa arki pi ran wa hetuku p ne ruwe ne. Kusu, onaha a=pa ka eaykap ruwe ne. Ene an kusu, aynumosir ta iotta hoskino hetuku cikuni sekor upaskuma=an ruwe ne. Cikisani piskan ta susu ka oka ruwe ne. Korka, susu nani sukup kusu, hoskino ci ruwe ne. Kusu, okake ta sep uske ta cikisani patek an siri a=kar ruwe ne. Kusu, hapkitayke ta kapatcir ka rew wa, kamuy ka onisposo hawe ne. Ene an kusu, cikisani kamuy ne a=nukar ruwe ne. Miki nispa anak, aynu upaskuma, aynu itak patek arikikino a=uuste p epotara siri ne. Iwor sak no puri eysoytak ka eaykap sekor hawean ruwe ne. Ene an kōza ku=nu ayne, aynupuri k=eramiskari pe na akkari oka kuni ku=ramu ruwe ne. Ne kōza kes pa oka noyne siran kusu, Tokiyo ta oka utar paye=an wa a=nukar yak pirka nankor na!
Sirawoy ta an ahunrupar oruspe
Tap uhunak Nupurpet un k=arpa korka, Nupurpet tesapa piskan ta “ahunrupar” an yak a=ye p Google Maps ka ta a=nuye kusu, ne uske un ka k=arpa a. Ahunrupar anak aynumosir or wa kamuymosir or un arpa=an easkay poru ne wa, New Express ka ta a=nuye p ne kusu, “hempara ka a=nukar rusuy wa” sekor ohonno ku=yaynu wa k=an. Tesapa or wa 20 pun akkari k=arpa wa, Nupurpet tomari sam ta an pon ru or peka k=apkas a k=apkas ayne, ne poru ku=pa. Piskani ta tu kanpan ka oka wa Sirawoy ta oka aynu utar teeta wano ye upaskuma a=nuye wa oka. Ponno asitoma p ne korka k=ekiroroan kusu, ecioka ka eci=nukar yak pirka na!
Etupirka ci=nukar
Tanto, Kasai Rinkai Kōen or ta etupirka ku=nukar. Etupirka anak aynumosir un etu sonno pirka cikap ne. Ma ka hopuni ka easkay pe ne! Teeta Atkes ta poronno an korka, poro ermu osoyne arki wa opitta ronnu kusu, tane kemian pe hawe ne. Tane mata ne wa kusu nanu kunne korka, sak an kor rapu sinna wa, retar.
Aynu aep mise or un paye=as
Irankarapte. hoskinuman, ku=tokuye tura “Umizora no Haru” sekor a=ye aynu aep kor mise or un paye=as wa ipe=as. Kimunkamuy ne yakka, yuk ne yakka, usa kemian kam c=e hine, citatap, ruipe, ohaw yak a=ye asur'an aep ka a=sapte ruwe ne. Citatap anak makiri ani yaykata ci=tatatata easkay pe ne. Opitta sonno keraan. Orano, ikuso anak cise koykar wa, ruunpe sekor a=ye amip ka ikupasuy sekor a=ye aeywankep anu wa an wa, ani c=esinot ka easkay pe ne. sisam ku=ne kusu easir ku=nukar pe poronno oka.
Hure niham
Irankarapte. Sitcuk a hi kusu, hoskinuman Saitama or un Nagatoro or ta hure niham ci=nukar wa paye=as. Nagatoro anak, poronno hure niham ne ya, poro sam pitar ne ya ani asur'an ne. Nea to sirpirka wa cipo=as wa nay ka ta payoka=as ne. Nagatoro kor peker wakka wa pirka konru a=uk ka easkay kusu, kakigori k=e ruwe ne. mean hikeka, sonno keraan.
Pirka nonno
Irankarapte. Uhunak wa, sirwen wa an yakun HIGAMBANA sekor a=ye nonno hecirasa pa kor an. Sitcuk wa, tokap takne hi tunas kunne an kusu, isirkurantere! Tan noka anak ku=cise un mintar ruwe ne.
Asir kotan kor cise
Irankarapte. tanto numan koraci sirmeman humi. Tan kunneywa, ku=soyne wa maciya or ta k=arpa yakun, kotan kor cise a=wente wa, opitta asir cise a=kar wa an=an. Shōgakusei ku=ne or un hi, nea cise or un k=arpa wa yukar k=nukar wa k=okere. tan hi ora husko kotan kor cise k=eywanke ka somo ki hikeka, k=osiknuka siri sinna=as pe ku=kopan na.